У Польшчы неўзабаве парламенцкія выбары. Учора, 23 жніўня урад Польшчы афіцыйна абвясціў пра пачатак кампаніі. З высокага і нізкага стартаў ў гонцы ўзялі ўдзел 7 партый, з якіх толькі дзве - Саюз дэмакратычнай лявіцы і Партыя працы - належыць да левага флангу. Астатнія ж бадзяюцца паміж цэнтрам і правым флангам. Пакуль палітыкі завучваюць прамовы, збіраюць кампрамат на супернікаў ды абдумваюць меню для банкетаў, рэкламныя фірмы рыхтуюцца да жніва, каб запоўніць свае засекі велічэзнай колькасцю грашовых знакаў. Штораз выбары ў нашых суседзяў каштуюць усё даражэй, незалежна ад яўкі выбарцаў на ўчасткі. Палітыкі не сквапнічаюць - чатыры гады ў парламенцкіх фатэлях вартыя тых грошай.
Лёс Муамара Кадафі ўжо вырашаны. Аднак ці стане перамога паўстанцаў лагічным канцом лівійскай "рэвалюцыйнай вясны"? Ці здолеюць пераможцы ўтрымаць свае заваяванні, захаваць крохкі грамадзянскі мір паміж шматлікімі кланамі і плямёнамі, мір, які каля 40 гадоў падтрымліваўся "жалезнай рукой" палкоўніка Кадафі? Лівійская скрыня Пандоры адчынена і будучыня краіны пакуль выглядае досыць цьмяна.
У кіраўніцтва Рымскай імперыі была адна вялікая праблема - плямёны варвараў з іх спробамі рабаўнічых заездаў на памежныя тэрыторыі. Чым больш пашыралася імперыя, тым больш востраю была праблема, якая развязалася разам са знікненнем імперыі, бо тыя варвары ўрэшце яе знішчылі. Амаль праз 2000 гадоў сітуацыя выглядае падобна: кантрабандысты нібы тыя варвары атакуюць межы сучаснага геапалітычнага монстра - Еўрапейскага Саюзу. Якія пагрозы нясуць яны эканоміцы аб'яднанай Еўропы? Пра гэта на старонках часопіса "Палітыка" разважае Іяана Сольска.
