Вядома, што жанчыны па-рознаму рэагуюць на сэксуальны гвалт. Бывае жанчына не прызнаецца ў тым, што яе згвалцілі, бо баіцца агалоскі і кпінаў з боку родных і суседзяў. Жанчына-ахвяра не заўсёды знаходзіць падтрымку і спачуванне ў грамадстве. Але што можна сказаць пра кабет, якія ўдаюць ахвяр гвалту, хоць насамрэч ніхто і пальцам іх не крануў? Ці можа маюць рацыю тыя, хто сцвярджае, што "кожная жанчына марыць пра згвалтаванне"? Польская паліцыя спрабуе разабрацца з такімі "ілжэ-ахвярамі".

Вось ужо два тыдні запар польскія СМІ атрымліваюць паведамленні пра выпадкі нападаў і гвалту жанчынаў у Зялёнай Гуры ды ваколіцах. Паліцыя зрабіла фотаробат маньяка і развесіла яго па ўсяму любускаму ваяводству. Аднак інфармацыя пра гвалт працягвае паступаць. І вось нядаўна высвятлілася, што дзве заявы пра напад "невядомага мужчыны" былі фальшыўкамі.

Уначы з суботы на нядзелю жыхарка мястэчка Губін звярнулася да паліцыі з паведамленнем, што на яе напаў і згвалціў маньяк, каторы выглядаў дакладна як фотаробат з тэлевізара. Цэлую ноч мясцовая паліцыя абшуквала наваколле, а раніцай высвятлілася, што ніякага нападу не было. Праз некалькі дзён яшчэ адна жанчына заявіла, што маньяк кінуўся на яе і параніў нажом падчас спробы згвалціць. Аднак лекар, які агледзеў ахвяру "нападу", выключыў гвалт і нажавую рану. Абедзве "ахвяры" былі п'яныя перад зваротам да паліцыі. Зараз "няўдачніцам" пагражае да трох гадоў няволі.

Па паведамленнях польскіх СМІ