У межах эксперыменту італійскія школьнікі на год заменяць падручнікі на ноўтбукі. Шэсьдзесят вучняў ва ўзросьце ад 8 да 10 год у адной з турынскіх школаў будуць выкарыстоўваць замест кнігаў невялікія ноўтбукі.

Ноўтбукі для школьнікаў будуць зробленыя італійскай кампаніяй Olidata, на іх будзе ўсталявана аперацыйная сістэма Windows. Кампутары важаць меней за кілаграм і іх можна будзе раняць з вышыні 1,5 метры, да таго ж яны будуць воданепранікальнымі. Доступ школьнікаў у інтэрнэт з ноўтбукаў будзе абмежаваны спецыяльнай праграмай.

Аўтары эксперыменту спадзяюцца, што пры дапамозе гэтага праекту атрымаецца значна скараціць выдаткі на навучаньне. Ноўтбук Olidata каштуе меней за 400 даляраў, а камплект падручнікаў кожны год абыходзіцца ў 700 даляраў.

Бацькі ўжо падтрымалі эксперымент, яшчэ адной мэтай якога зьяўляецца высьветліць, наколькі кампутар можа палепшыць працэс навучаньня.

(паводле брытанскіх СМІ)