Сцэнарыст і прадзюсар Бобі Марэска намерваецца перанесці ў кіно гісторыю жыцця Аліны Фернандэс, адзінай дачкі кубінскага лідэра Фідэля Кастра. Цалкам верагодна таксама, што Марэска, які атрымаў калісьці “Оскара” за сцэнар “Горада гнева” выступіць рэжысёрам гэтага фільму.

Фернандэс - дзіця Кастра і ягонай патаемнай каханкі, з якою ён меў зносіны падчас свайго першага шлюбу. У 10 гадоў Аліна даведалася, што мужчына, які наведвае іх сям’ю ўначы і чалавек, якога яна бачыць па тэлебачанні – гэта яе бацька. У 1993 годзе яна выехала з Кубы ў Гішпанію, а потым пераехала ў ЗША. У 1998 годзе Фернандэс надрукавала свае ўспаміны пад назваю “Дачка Кастра: мемуары выгнанніка з Кубы”, у якіх апісала свой лёс і жыццё на Кубе.

Прадзюсары не плануюць экранізаваць толькі біяграфію дачкі Кастра, яны маюць намер зрабіць эпапею кшталту “Горада гнева”. У фільме апрача гісторыі пра Фэрнандэс плануецца паказаць партрэт кубінскага грамадства. Сама Фернандэс выступіць кансультантам на здымках фільма. (па матэрыялах РАР)