Літоўцы ўжо пачалі рыхтавацца да 600-годдзя Грунвальдскай бітвы. Урад прыняў рашэнне прафінансаваць здымкі мастацкага фільма, прысвечанага гістарычнай падзеі, якая ў літоўскай версіі называецца “Жальгірыс”.

Прэм’ер-міністр Кіркілас карэктна вызначыўся, што “Жальгірыская тэма – не толькі тэма Літвы, але і нашых суседзяў – палякаў, беларусаў, расейцаў, немцаў, украінцаў, з якімі мы спадзяемся ўсталяваць у гэтай справе партнёрскія стасункі “. МЗС даручана празандаваць цікаўнасць да удзелу ў праекце іншых краінаў.

Планаваны бюджэт карціны “Жальгірыс – Жалезны Дзень” складае каля 5 млн даляраў. Аднак жа літоўская доля, як мяркуюць урадоўцы, павінна быць не меншаю за 3 млн. Іначай – баяцца, каб замежныя “партнёры” не навязалі рэжысёру сваё бачанне падзеяў.

Аўтар сцэнарыю да фільма – славуты Юозас Марцінкявічус, здымаць кіно будзе Раймундас Банёніс. Літоўцы спадзяюцца, як знойдуць грошы, закончыць здымкі акурат да юбілею, у 2010 г.

(паводле матэрыялу penki.lt)