Савецкая народная прыкмета сцвярджала: калі кладуць асфальт – значыцца, хутка будуць яго ламаць. Нешта падобнае і ў Балгарыі: каб стварыць дзе турыстычны цэнтр – трэба месца затапіць, а пасля... асушыць.

Штучнае возера Капрынка ў цэнтры Баўгарыі выкапанае ў канцы 40-х гг мінулага ст. Як яго капалі, знайшлі не абы-што – старажытную сталіцу краіны Фракіі, Сеўтопаль. Знайшлі і затапілі.

Цяпер Сеўтопаль плануецца падняць з 20-метровае глыбіні і прыцягваць да гэтага археалагічнага дзіва па паўмільёна турыстаў на год. Эксперты кажуць, што 50 гадоў пад вадою фракійскай сталіцы не зашкодзіла.

Архітэктар Жэка Цілеў, аўтар праекту пад’ёму Сеўтопалю, плануе асушэнне часткі возера і стварэнне штучнае выспы, ніжэйшае за ўзровень вады. Каб уладкаваць такую выспу, мяркуецца абкружыць яго мурамі дыяметрам у 420 м і даўжынёю ў 1300 м.

(паводле матэрыялу prostir.museum/news/ua)