На еўрапейскі рынак прыйшоў новы гатунак калумбійскае кавы – “Мансэрат”. Новая кава мае адметныя водар і смак, але яе галоўная “разынка” не ў гэтым. Кава “Мансэрат” урабляецца акурат на тых землях, дзе доўгі час вырошчваліся адно наркатычныя кока і амапола.

Што праўда, у калумбійскай вёсцы Мансэрат калісьці каву выраблялі. Аднак неспрыяльнае надвор’е ў прыродзе і на міжнародных рынках павярнула сялянаў 20 гадоў таму да іншых, выгаднейшых раслінаў. Вяртанне кавы адбылося тут у межах фінансаванай ўрадам “замяшчальнай” праграмы для фермераў.

Кава “Мансэрат”, паводле ацэнак мэнэджэраў кававых кампаніяў, мае надзвычайны попыт сярод гурманаў. Відаць па ўсім, “наркатычная” легенда дадае напою асаблівага смаку ў вачах знаўцаў. Так або іначай, але “замяшчальная” кава выдатна прадаецца – блізу 200 тонаў на год.

(паводле матэрыялу ictv.ua)