Ад мінулага тыдня з усіх грамадскіх пабудоваў у венгерскай вёсцы Леаніфалу зніклі сцягі Еўрапейскага Саюзу. Гэткім чынам жыхары венгерска-славацкага памежжа адрэагавалі на выхад у Славакіі новых падручнікаў для школ.

Паводле словаў старасты 3х-тысячснае вёскі, Чабу Ньры, ягоных землякоў надзвычай абурылі апошнія навіны ад супляменнікаў з-за мяжы. Славацкіх венграў нібыта прымушаюць вучыцца ў школах па падручніках, дзе ўсе геаграфічныя назвы – толькі па-славацку.

Дэманстрацыя з здыманнем сцягаў, у разуменні вяскоўцаў, павінна стаць сігналам для Брусэлю: разбярыцеся з уціскам меншасцяў у Славакіі. Славацкія ж палітыкі каментуюць навіну спакайней. З іхных словаў, уздбуджэнне нацыянальных пачуццяў у Венгрыі надта ж падазрона супадае з растучым там эканамічным крызісам.

Фінансавы крызіс адбіўся на венгерскай эканоміцы мацней, чым на суседскіх. Вось сродкі масавае інфармацыі і пераключаюць увагу насельніцтва з грашовых нястачаў на гаротны стан “братоў у замежжы”. Аднак жа, віцэ-прэм’ер Славакіі паабяцаў венгерскія заўвагі ўлічыць і ў падручніках у далейшым назвы даваць на дзвюх мовах.

(паводле матэрыялу pravda.sk)